PEPATH MINANG(ladiang minang)

LADIANG MINANG Saumpamo baladiang maja, bao malagak iliah jo mudiak, lai diayun indak mamutuih, urang maliek galak bagumam. Aka kok indak basanda iman, tak basitumpu kapado tauhid, pikiran lia baangan-angan, asik balenong baputa-puta, acok mancari jalan mailak, suko tagak di pimbatang, urang baluluak liau basorak. Kutiko rapek bakalalaran, tibo barundiang mancari karuah, baprinsip lungga bapaham guyah, manjadi miang di nan rami. Itulah aka tak diridhoi. Adopun sabaliaknyo, Saumpamo lai baladiang tajam, alun diayun catuak lah putuih, rundiang sudah, kusuik salasai . Jikok aka janiah pikiran sampai, prinsip tagok paham pun padek, alemu langkok kaji pun putuih, buahnyo Akhlakul Karimah. Suko manolong namuah mambantu siap bakubang mandi kudo, bakeh basanda jo basitumpu, ka tampek tanyo jo barito buek mangadu rang nan banyak, Itulah aka nan diridhoi. Walau bakato balunak lambuik, bamuluik manih kucindan murah, tapi prinsip indak batuka, bapaham pantang baraliah. Jikok muluik manih buek manipu kalau cadiak untuak mangicuah, laku manuka cupak jo gantang, awak mandapek urang marugi, munapiak diri kato agamo, sansaro sampai ka akhiraik. *** Oiii nak kanduang dibadan ayah, kamanakan didiri mamak, ikolah tuah sabana tuah, harkat dirinyo urang Minang. Ladiang Minang bukanlah baja, karih Minang bukannyo basi, tapi, hati nan janiah, aka nan bana, pikiran batua, lidah nan luruih, sarato parangai nan bakurenah. Asah ladiang aka jo pikiran, nakan, patajam karih bathin jo budi, nak pambangkik batang tarandam, Minangkabau kumbali bakilek lai.